Yê ûse ayeke da tî hînga, töngana wamäbê aleke bê tî lo tî kpîngba na kwa tî Nzapä, na lâ tî finî tî lo kwê :

I) EGLISE WA LAÂ SÏ ALÎNGBI WAMÄBÊ ABÔNGBI DA ?

Tëtî, bîanî, mängö-na-bê ayeke gï tî kângbi na sïökpärï bîanî-bîanî awe pëpëe : a lîngbi finî wamäbê agwe lâkwê na da tî Nzapä, tî mä tënë tî Lo, na tî sâra bêôko na âmbâ tî lo âmêlengê tî Nzapä tî ndo tî lo. Sô ayê tî tene : Eglise wa laâ sï ayeke tambêla gï na lêgë sô Nzapä ayê ?

Sô, kötä tënë na lê tî Nzapä, tëtî Lo yeke dutï gï na pöpö tî âzo sô amû ngîâ na Lo ! Ë asa gbe nî kêtê, ë bâa.

Mîngi nî, finî wamäbê ayeke gwe gï na pekô tî zo sô agä na lo na Nzapä, me sô ayeke nzönîi ?

Tî pîri nî, a yeke nzönî tî hûnda terê : "Eglise sô mbï yê tî gwe da sô alütï mbîrîmbîrî gï na ndö Tënë tî Nzapäâa, wala ndiä tî âzo asï-sïngö na yâ nî ?". Mbênî lâ, na gbelê Nzapä, fadë wamäbê ôko ôko kwê ayeke kîri ânde tënë, ndâli tî lo-mvenî, na hündängö-ndo sô ! A yeke yê tî ngîâ pëpëe !

Tî kîri tënë na taâ lêgë nî na hündängö-ndo sô, a yeke nzönî tî hûnda terê kôzo : TAÂ-TËNË ALÖNDÖ NA NDO WA ? FADË MBÏ HÎNGA TAÂ BÏBÊ TÎ NZAPÄ TÖNGANA NYE ?

Wamäbê ! Hînga sô, fadë mo wara taâ bïbê tî Nzapä gï na yâ Mbëtï tî Lo ôko ! Na mbênî ndo ndê ôko pëpëe ! Lêgëôko töngana tî sô mo wara lêgê tî salut gï na yâ ôko Mbëtï sô ! Gï nî ôko laâ sï ayeke kpïngbä ndiä tî mäbê sô asôo zo ! Tanga tî ndiä kwê ayeke gï vene ! Gï tënë tî yâ tî Mbëtï sô laâ sï Yingö tî Nzapä ayeke pîka na bê tî zo, tî fa na lo lêgë tî tämbëlängö da töngana tî sô Nzapä ayê !

Nî laâ sï Paul awa Eglise tî Ëfêze giriri tî lütï na ndö nî na ngoi sô âwato tî Nzapä ayeke tö ânde ndâ tî särängö sïönî na yâ Eglise ; lo wa âmêlengê tî Nzapâ pëpë, tî kpë tî gwe na gbe tî mbênî pape, wala na gbe tî mbênî bôngbi tî awakwa tî Nzapä, atâa Lo-Mvenî laâ sï Lo îri âla na gïgï. Paul atene :

"Fadësô, mbï zîa âla na tïtî Nzapä, ngâ, na Tënë tî grâce tî Lo, sô alîngbi sâra sï âla kpîngba..." (Âwatokwa 20 : 32).

Na tângo sô yê kwê agbangba na yâ Eglise tî Timothée aweê, Paul atene ngâ na lo :

"Me tî mo, ngbâ gï na lêgë tî yê sô manda mo awe... Töngana mo de giri mêlengê, mo hînga Mbëtï tî Nzapä nzönî mîngi, sô a lîngbi mû na mo ndarä tî wara salut..." (2 Timothée 3 : 14 - 17).

 Mbëtï tî Âhêbro (Hébreux) atene ngâ : "Tënë tî Nzapâ ayeke na finî, na ngangü..." (Âhêbro 4 : 12).

Wamäbê ! Fadësô mo hînga awe : nzönî lêgë gï ôko, tî müngö nî, na yâ âyê tî hânda sô a gä tî yîngi mäbê tî mo, a yeke gï Mbëtï tî Nzapä, me âyê tî âkötarä na yâ mäbê, wala ndiä tî âzo, wala âtënë sô sï âzo amä yângâ tî terê da, pëpëe, atâa âtënë nî sô asï-sïngö na dônzi.

Me Mbëtï tî Nzapä nî atene nye, tî hïngängö na église sô sï ayeke lütï tî lo gï na ndö tî tënë tî yângâ tî Nzapä ?

Töngana mo dîko 2 Timothée 2 : 19, nzönî, fadë mo yeke mä, sô, atâa âsïönî yê abutuma na yâ tî Eglise :

"Fadë kpïngbängö gerê tî da sô Nzapä alü na yâ tî sêse awe sô, ayeke yîngi ânde ôko pëpë. Mbëtï sô Lo sü na terê nî atene kötä tënë ûse : 'Kötä Gbïä ahînga taâ âzo sô ayeke tî Lo' (sô, tî mbâgë tî Nzapä laâ), ngâ, na : 'Zo sô sï atene nï yeke taâ zo tî Kötä Gbïä, ayeke nzönî lo kângbi na sïökpärï' (sô, tî mbâgë tî ë zo).

 Na ndo sô, ayeke nzönî mo hînga sô, "sïökpärï"  ayeke gï tënëngö vene, fängö zo, nzï, na âmbênî yê töngasô pëpëe ; a yeke ngâ : särängö yê kwê sô alöndö na yângâ tî Nzapä pëpëe, me sô sï zo laâ sï aleke yê tî lo, a lîngbi na nzara tî bê tî lo, töngana ândiä sô kwê sï giriri Eglise alü nî, sï âreformateur töngana Martin Luther, wala Jean Calvin, Jean Huss, na âmbênî sô, ake nî na kürü gô, sï akîri na mäbê gï na ndö tî Mbëtï tî Nzapä ôko.

Töngasô, taâ mängö yângâ tî Nzapä, na yâ tängo tî âyê tî sïönî, ayeke tî sïgïgï na yâ sïökpärï, tî dutï ndê. Me tî hînga sô mbênî église alü gbâ tî ândiä tî bê tî lo, tî ngbâ na yâ nî, na tî kü tîtene ânde fadë yê kwê agä nzönî gï na bê tî lo ayeke särängö bêôko na sïökpärï sô, na tî grisa, sô, Nzapâ atene :

"Âla sïgïgï na pöpö tî âzo sô, âla dutï yongôro na âla. Âla ndü mbênî yê tî sïönî ôko pëpëe. Töngasô ânde sï Mbi yamba âla" (2 Korente 6 : 17).

 Zîa ngâ sï mbito asâra âla sô sï amä yângâ tî Nzapä, sï ayêda tï sïgï na pöpö tî âyê tî sïönî pëpëe : fadë ânde Yingö tî Nzapä, sô apûsu âla tî sïgï, atêngbi âla na âmbênî zo tî Nzapä, sô sï ayeke kpë ngâ mbito tî Nzapä sï, atâa âla wü mîngi pëpë, Nzapä ayeke na pöpö tî âla, töngana sô Lo mû zëndo nî awe : "...ndo sô âzo ûse, wala otâ, abôngbi na ïrï tî Mbï, Mbï yeke na pöpö tî âla" (Matthieu 18 : 20).

II) EGLISE SÔ SÏ AYEKE NA FINÎ

Âwamäbê sô sï Nzapä azîa na bê tî âla tî sïgï na yâ ândiä tî âzo, na tî kîri tî bôngbi na ndo ôko, na pöpö tî âla, abôngbi pëpë tî mû vündü na Yingö tî Nzapä, wala même tî mîngo Lo, na lêgë tî lüngü âfinî ndiä tî âla mvenî, sô akânga lêgë na âmbênî âwamäbê, sô tambêla tî âla ayeke na lêgë nî kwê, tî sâra kusâra tî Nzapä na âmatabïsi kwê sô sï Yingö amû na âla.

Töngasô, ayeke nzönî tî hînga : zo wa, wala âzo wa laâ sï ahînga tî fa tënë, wala tî he bîâ, wala tî sambêla na yâ Yingö, wala tî mû wängö, wala tî mû mambôko na âzo tî mawa, zo wa ? A yeke nzönî zo na zo awara ndo tî lo na yâ finî bôngbi sô, tî sâra na Nzapä na bê-bîanî, na matabïsi sô kwê lo wara.

Na töngana âla bôngbi terê, zo na zo asambêla Nzapä, amû singîla, ahûnda yê na tïtî Lo, awa âîtä, ahe bîâ, adîko Mbëtï tî Nzapä, wala afa ndâ tî Tënë tî Nzapä, gï töngana sô Yingö azîa nzara nî na bê tî lo, lâsô. Gï zo ôko, wala gï âmbênî zo na pöpö tî âla laâ sï alîngbi sâra yê kwê pëpëe : sô, kängängö lêgë na Yingö tî Nzapä tî mû kôbe na Eglise tî Nzapä, a lîngbi na nzara tî lâsô !

Na a lîngbi ngâ kusâra kwê atambêla lâkwê gï töngana sô prögrâme afa awe sô pëpëe ! A so tî lo bê tî Nzapä ôko pëpë, töngana bîrï, bôngbi atöndânî na bïngö nginza tëtî kwa tî Nzapä, na lâsô, atöndânî na fängö-tënë, na kekerêke, atöndânî na sambêla tî müngö singîla, wala tî hündängö mbênî yê na tïtî Nzapä pëpëe ! A yeke nzönî tî zîa Yingö afa yê tî särängö-nî, na pekô tî terê, gï töngana tî sô anzere na Lo, tëtî Lo yeke Nzapä, na âzo agä na bôngbi gï tî sepela Lo, me tî zîa na Lo gï lêgë tî lï na yâ prögrâme tî âzo pëpëe !

III) NDÂ TÎ TËNË

Na yâ marä tî bôngbi töngasô, ë bâa sô âkpïngbä yê otâ laâ sï ayeke mû finî na yâ Eglise :

1) Jésus-Christ, sô sï Lo yeke göndâ tî Eglise nî, ngâ, na li tî Eglise nî ; Lo laâ sï Lo yeke fa yê na Eglise tî Lo ; kömändëmä ayeke tî Lo, gï Lo ôko, me tî âzo pëpëe ;

2) Mbëtï tî Nzapä, sô ayeke na finî, na ngangü tî bîan bê tî zo : yê kwê sô wamäbê alîngbi sâra, tî mû gloire kwê gï na Nzapä ôko, ayeke na yâ nî ; yê ôko amankêe da pëpëe ;

3) Yingö tî Nzapä, sö kusâra tî Lo ayeke tî zîa zo ôko ôko kwê na taâ ndo tî lo na ya Eglise nî, a lîngbi na matabïsi tî lo. Mbênî kpïngbä kwa tî Lo ayeke tî soro kôbe tî mäbê, na yâ Mbêtï tî Nzapä, na  tî mû nî na zo ôko na ôko, a lîngbi na nzara tî lo.

Eglise kwê sô sï azîa lêgë na Jésus-Christ, Mvenî tî lo, tî fa lêgë na lo, na azîa ngâ ndo kwê na Yingö tî Nzapä, tî gbô kömändëmä tî kusâra kwê na yâ Eglise nî, ayeke na finî, na ngangü tî Nzapä, sô alîngbi kwê, lâkwê, na yâ yê kwê, na ndo kwê. Fadë Eglise töngasô agä ânde yëndû lâ ôko pëpë, na yâ kusâra tî Nzapä.

Grâce, na sîrîrî tî Nzapä Babâ, angbâ na âla kwê, tëtî lâkwê-lâkwê, na ïrï tî Jésus-Christ !