BIRÂ TÎ MÄBÊ AYEKE NYE ? A dü zo na dûnîa tîtene lo manda tî hînga Nzapâ tî Yäyû, Lo sô Lo sâra yê kwê, na tî sâra na Lo na ngangü tî lo kwê, na lâ tî finî tî lo kwê. Me töngana lo hînga Nzapä pëpë, lo yeke tiri âbirâ tî lo kwê gï na ngangü tî lo-mvenî, na lo zîa bê tî lo kwê gï na âyê tî âkötarä, ngâ, na hïngängö-yê tî lo-mvenî. Mîngi nî, na yâ marâ tî birä nî sô, zo ayeke gwe, ayo pëpëe, ngbanga tî sô, gbää, lo yeke tï na ndö tî mbênî zo sô ayeke ngangü, ahön lo... Ka töngana lo mû bê tî lo kwê na Nzapä aweê, ândiä tî birä tî dûnîa nî kwê agä ndê awe, ndâli tî sô, Mvenî tî dûnîa nî, sô Lo hînga ndâ nî nzönî sô, laâ sï ayeke gbôto lo, tî hön na lo na âlêgê sô sï Nzapä aleke kôzo awe kwê, gï ndâli tî lo ! Sîrîrî asï-sïngö na lêgë nî sô, na gï Nzapä-Mvenî laâ sï ayeke bata lo na ndo kwê, na yâ yê kwê, sï lo ngbâ tî sâra na Nzapä na taâ sîrîrî kwê. Âbirä tî lo kwê, lo yeke tiri nî gï na âyê tî birä sô sï Nzapa ayü lo na nî. Âwato tî lo ayeke âmbâ tî lo zo mbênî pëpëe, me âyingö sïönî sô sï ayeke hânda zo tî sâra sïönî na âmbâ tî lo, atâa lo yeke sêngê zo, wala wangangü tî ködrö. Nî laâ sï ë yeke hûnda na âîtä tî ë na yâ mäbê, na gböngö gerê tî âla mîngi, tîtene âla dîko yê sô Mbëtï tî Nzapä ayeke tene na ndö birä tî mäbê sô, na âla bata nî na bê. Fadë Nzapä tî Kötä Ngangü Ahön Kwê amû kpïngbä mambôko na âla, na yâ birä tî âla kwê, zûskâ ânde ë kwê, ë bâa terê na Yäyû ! Ndoyêe na Ngangü tî Nzapä angbâ na âla, na Ïrï tî Jésus ! CMM - MNA ËFÊZE (Ephésiens) 6 : 10 - 18 10. Tî hûnzi na nî, a yeke nzönî âla kpîngba na yâ Nzapä, gï na lêgë tî wärängö ngangü tî âla kwê na yâ Kötä Ngangü tî Lo.   11. Âla yü yê tî birä tî Nzapä kwê, tîtene âla hînga lêgë tî kängängö bê, na yâ âyê kwê tî hânda tî zâbolo.   12. Tëtî ë yeke tiri birä tî ë na âmbâ tî ë zo pëpëe, me na ângangü ködrö tî âyingö-sïönî, na âyingö-sïönî sô ayeke âkömändëmä na pöpö tî âmbâ tî âla, na âgbïä tî bîngo tî sêse sô, ngâ, na âyingö tî sïönî-bê sô ayeke na yâ pupu, na li tî ë.   13. Ngbanga nî laâ sï a yeke nzönî âla mû yê tî birä tî Nzapä kwê, tîtene âla ngbâ tî lütï töngana âkôlï na lâ tî sïönî birä tî wato, na âla ngbâ lâkwê tî lütï na ndüzü, na pekô tî sô âla hön wato awe sô.   14. Âla gbû ngangü ! Âla mû taâ-tënë töngana kâmba tî kânga na ndö tî bongö, na terê tî âla ; âla yü särängö gï nzönî-yê töngana kazâka tî wîn na kate tî âla.   15. Âla yü kötä nzara tî gwe tî fa Tënë Nzönî tî Sîrîrî töngana pörö na gerê tî âla.   16. Na ndö tî âyê sô kwê, âla mu mäbê töngana vâla tî âla, tîtene âla mîngo na âkokora tî wâ sô wato ayeke tokwa na ndö tî âla.   17. Âla yü ngâ kpoto tî salut, na yongôro zeme tî Yingö, sô ayeke Tënë tî Nzapä.   18. Âla sambêla âmarä tî sambêla kwê, na yâ Yingö, ngâ, na tötöngö na Nzapä. Âla wôko na yâ sambêla töngasô lâ ôko pëpëe ; âla sambêla nga mîngi ndâli tî âzo tî Nzapä kwê.